Ауаның жақсы сапасын сақтау халықтың денсаулығы, қоғамның гүлденуі және табиғи экожүйелердің тұтастығы үшін өте маңызды. Ластаушы заттар мен парниктік газдардың шығарындыларын азайту климаттың жылдам өзгеруін тежеудің
кілті болып табылады. 2019 жылы парниктік газдар шығарындылары бойынша әлемде 21-ші орында тұрған Қазақстан климаттың өзгеруі мен ауаның ластануының күрделі өзара байланысына тап болды. Ауаның ластануы жыл сайын 10 000-нан астам адамның мезгілсіз өліміне әкеледі, ал экономикалық шығын Дүниежүзілік банктің 2023 жылғы мәліметтері бойынша шамамен 10,5 миллиард долларды құрайды.
Қазақстан Париж келісімі сияқты негізгі климаттық келісімдерге қосылып, 2060 жылға қарай көміртегі бейтараптығына қол жеткізу мақсатын қойғанымен, Ұлттық бейімделу жоспары сияқты кешенді стратегиялар әлі де дамудың бастапқы сатысында. 2021 жылы жаңартылған Экологиялық кодекс бейімделуге де, «ластаушы төлейді» принципіне де
баса назар аударады, бұл климаттың өзгеруі мен ауаның ластану мәселесін бір уақытта шешудің маңыздылығын көрсетеді. Осы екі мәселе өзара байланысты болғандықтан, ауаның ластануын бақылау жергілікті денсаулық сақтау мәселесі ғана емес, сонымен қатар климаттың өзгеруіне қарсы жаһандық күрестің маңызды аспектісіне айналады.
Қазақстан – көмір, мұнай, газ және мыс өндіруден дүние жүзіндегі ең ірі өндірушілердің бірі. Сонымен қатар,елімізде бірнеше ауыр өнеркәсіп орындары, соның ішінде металлургия және мұнай өңдеу зауыттары орналасқан. Созылмалы инверсиялармен сипатталатын айқын континенттік климатына байланысты Қазақстан атмосфералық ауаның ластану мәселесіне және оның ластануын азайту бойынша
кешенді шараларды қабылдау қажеттілігіне тап болды. Бұл мәселе жалпы өмір сүру сапасына әсер етіп қана қоймайды, сонымен қатар климаттың өзгеруінің қарқынын жылдамдатуға әсер етеді.
Бұл зерттеу өнеркәсібі дамыған Қарағанды аймағына ерекше назар аудара отырып, ауаның ластануы мен климаттың өзгеруінің заңдылықтарын, мерзімдерін және себептерін зерттеуге бағытталған. Өнеркәсіптік кәсіпорындар мен тұрмыста көмірді пайдаланудан ластанудың күшеюі екі мәселенің өзара терең байланысын көрсетеді.